As illas Cíes acolleron estes días unha xornada de adestramento de cans guía da ONCE, que aproveitaron os camiños e pasarelas do arquipélago para continuar coa súa preparación nunha contorna diferente á habitual.
O contacto con novos espazos, ruídos, superficies e a presenza de visitantes permite aos animais familiarizarse con situacións diversas e aprender a reaccionar con calma e seguridade. O adestramento non se limita ás habilidades técnicas: tamén se traballan a confianza, a concentración e a capacidade de adaptación.
A sesión espertou a curiosidade das persoas visitantes, que puideron coñecer de preto o proceso de formación destes animais antes de que comecen a acompañar persoas con discapacidade visual e contribúan á súa autonomía no día a día.
