Máis de 15.000 brotes de coniza foron retirados das illas Cíes durante as actuacións de conservación realizadas no marco dos campos de voluntariado ambiental do Parque Nacional das Illas Atlánticas. A intervención céntrase nunha especie foránea que atopou nas illas un territorio favorable para a súa expansión e que require un seguimento continuado.
O traballo dos voluntarios consistiu principalmente na retirada manual das plantas, unha actuación especialmente importante antes de que completen o seu ciclo e liberen novas sementes. A coniza ten unha elevada capacidade de colonización e pode reaparecer con facilidade nas zonas nas que xa se actuou, polo que a eliminación inicial debe ir acompañada de revisións posteriores.
Procedente de América do Norte, o xénero Conyza está actualmente moi estendido en Galicia. Entre as especies presentes atópase Conyza canadensis, capaz de producir numerosas sementes que poden desprazarse polo vento a considerable distancia. Esta facilidade de dispersión fai que o control da planta sexa unha tarefa a medio e longo prazo.
Nas Cíes, a presenza de especies vexetais introducidas cobra especial relevancia pola singularidade dos ecosistemas insulares. A expansión da coniza pode incrementar a competencia coa flora propia e modificar as comunidades vexetais que se desenvolveron de maneira natural no arquipélago.
A súa retirada súmase a outras actuacións de control de flora exótica que se veñen desenvolvendo no Parque Nacional, entre elas as dirixidas contra Carpobrotus edulis, Acacia melanoxylon, Eucalyptus globulus, Zantedeschia aethiopica, Arctotheca calendula ou Helichrysum petiolare.
Estas intervencións forman parte das medidas de conservación dos hábitats das Illas Atlánticas e dos proxectos Life Insular e Life Global, que buscan reducir a presión das especies invasoras e favorecer a preservación dos valores naturais do arquipélago.
