No marco do proxecto LIFE Wild Atlantic Nature (LIFE18 IPE/IE/000002), o IBADER da Universidade de Santiago de Compostela acolleu os pasados 9 e 10 de xuño un workshop internacional de intercambio de coñecemento sobre turbeiras de cobertor. No devandito evento participaron IBADER-USC, NPWS e Coillte Nature, entidades que participan como socias/beneficiarias nos proxectos LIFE INSULAR e LIFE Wild Atlantic Nature. O encontro permitiu reforzar as relacións de cooperación xa existentes entre estes equipos e favorecer a transferencia de coñecemento entre proxectos LIFE orientados á conservación e restauración de hábitats atlánticos de alto valor ecolóxico.
A xornada combinou sesións técnicas no Campus de Lugo coa visita de campo á Serra do Xistral, un dos territorios de maior relevancia para a conservación das turbeiras de cobertor no contexto atlántico europeo. Durante o encontro abordáronse cuestións relacionadas coa caracterización ecolóxica, a diagnose do estado de conservación, a restauración, o seguimento e a xestión destes hábitats prioritarios, así como a transferencia de coñecemento entre proxectos LIFE que traballan na conservación e restauración de ecosistemas atlánticos vulnerables.
Este workshop constitúe un fito de especial relevancia para o fortalecemento das sinerxías entre LIFE INSULAR e LIFE Wild Atlantic Nature, ao permitir o intercambio directo de experiencias entre equipos técnicos e científicos con ampla traxectoria na conservación de hábitats de interese comunitario. A colaboración entre IBADER-USC, NPWS e Coillte Nature reforza unha liña de traballo común orientada á mellora do coñecemento, á identificación de boas prácticas e á definición de metodoloxías compartidas aplicables á restauración e seguimento de hábitats naturais atlánticos.
A celebración deste encontro representa, ademais, unha oportunidade estratéxica para consolidar futuras colaboracións internacionais, establecer novas liñas de traballo e avanzar na creación dunha rede estable de cooperación entre proxectos LIFE, administracións ambientais e centros de investigación. Deste xeito, LIFE INSULAR continúa reforzando o seu compromiso coa transferencia de coñecemento, a cooperación técnica e a mellora da conservación dos ecosistemas insulares e atlánticos de maior valor ecolóxico.
