O proxecto LIFE INSULAR, organizou xunto ao proxecto LIFE GLOBAL, o Curso de Verán “Restauración da natureza: retos, estratexias e propostas de actuación“, durante os pasados 7 ao 10 de xullo de 2025, no Centro de Recepción de Visitantes “Casa da Costa” do Parque Natural do Complexo Dunar de Corrubedo e Lagoas de Carregal e Vixán (Ribeira, A Coruña, Galicia).
O curso reuniu a un total de 15 alumnos de titulacións técnicas enmarcadas no medio ambiente, profesionais dos organismos competentes en conservación da natureza e técnicos de administracións locais, que foron receptores dun conxunto de interesantes relatorios enmarcados nos obxectivos e metas establecidos pola Estratexia Europea de Biodiversidade, a Estratexia Europea de Infraestrutura Verde e o Regulamento Europeo de Restauración Ecolóxica. Todas estas disposicións están aliñadas coa estratexia de restauración levada a cabo por LIFE INSULAR.
Durante o curso os alumnos puideron coñecer de primeira man as localidades de actuación de LIFE INSULAR na illa de Sálvora, na ZEC Complexo húmido de Corrubedo (ES1110006), e discutir in situ os retos e aspectos estratéxicos da mellora do estado de conservación dos hábitats insulares na Rede Natura 2000.
