O pasado 18 de febreiro o IBADER do Campus Terra organizou un seminario online para promover a transferencia dos resultados das accións de produción de planta para restauración desenvolvidas polo proxecto LIFE INSULAR, do que é coordinador.
A xornada serviu para transferir os resultados obtidos sobre a micropropagación da camariña (Corema album) en Galicia ao persoal da Generalitat Valenciana encargado da conservación desta especie na súa única poboación presente na Serra Gelada (Alicante). No seminario participaron o persoal xestor do Parque Nacional das Illas Atlánticas, e membros do grupo de investigación Agrobiotech for Health da Universidade de Vigo como equipa especialista que levou a cabo os traballos de micropropagación.
Os resultados do proxecto poñen de manifesto a posibilidade de emprego desta especie para actuacións de reforzo poboacional, creacións de bancos de xermoplasma, garantir o seu mantemento a longo prazo e a viabilidade futura das súas poboacións. A xornada rematou cunha serie de recomendacións e medidas de xestión, así como o establecemento de futuras liñas de colaboración entre os xestores galegos e valencianos.
A participación do persoal competente da Generalitat Valenciana é un activo para LIFE INSULAR, xa que permite a replicación das leccións aprendidas polo proxecto noutros ámbitos e territorios, incrementando incluso a escala dos resultados mediante a posta en marcha de medidas de conservación in situ e ex situ mediante medios propios dentro do ámbito territorial da súa competencia, fomentando o potencial catalizador de LIFE INSULAR.
