O pasado 30 de xaneiro o IBADER do Campus Terra organizou un seminario online para promover a transferencia dos resultados da análise xenética realizada polo proxecto LIFE INSULAR, do que é coordinador.
A xornada serviu para transferir os resultados obtidos sobre a diversidade xenética e a relación de parentesco da poboación da camariña (Corema album) na Serra Gelada (Alicante), con respecto ao resto de poboacións ibéricas, ao persoal da Generalitat Valenciana encargado da súa conservación.
Os resultados do proxecto poñen de manifesto a necesidade de desenvolver medidas de conservación in situ e ex situ sobre esta especie, para garantir o seu mantemento a longo prazo e a viabilidade futura das súas poboacións. A xornada rematou cunha serie de recomendacións e medidas de xestión a curto e longo prazo que contribuirían a esta finalidade.
A participación do persoal competente da Generalitat Valenciana é un activo para LIFE INSULAR, xa que permite a replicación das leccións aprendidas polo proxecto noutros ámbitos e territorios, incrementando incluso a escala dos resultados mediante a posta en marcha de medidas de conservación mediante medios propios dentro do ámbito territorial da súa competencia, fomentando o potencial catalizador de LIFE INSULAR.
