Trala adxudicación dos traballos, durante o mes de novembro de 2022 comezou a primeira fase de eliminación de invasoras no Parque Nacional Marítimo-Terrestre das Illas Atlánticas de Galicia polo proxecto LIFE INSULAR.
A actuación comezou pola eliminación manual de Carpobrotus spp. na illa de Sálvora. A súa presencia é de grande preocupación polo seu elevado potencial invasor, a dificultade de acceso ás zonas nas que se atopa presente, e as dimensións que pode chegar a acadar algún dos individuos (máis de 200 Kg), que dificulta ainda máis a súa erradicación e manipulación.
A eliminación de invasoras por LIFE INSULAR rexeita o emprego de herbicidas, xa que se desenvolve en zonas fráxiles da Rede Natura 2000 con ecosistemas insulares altamente vulnerables e de carácter prioritario. A estratexia de LIFE INSULAR é exemplar e altamente replicable, podendo ser imitada noutras áreas de elevada fraxilidade, ou noutros territorios con características semellantes.
